Жаңалық - Аймақ жаңалықтары

Қарағанды облысының кәсіпкерлері коммуналды қызметтерге сараланған тарифтерді алып тастауды талап етіп отыр, ал халық бұған қарсы.

Облыста коммуналды қызметтер тарифі басқа өңірлердегідей жыл сайын өсуде. Соңғы өсім шілде айында болды. Бұл ретте тұрғындар, бизнес және бюджеттік ұйымдар үшін бағалар арасындағы айырмашылық та барған сайын өзгеріп жатыр. Мысалы, электрмен жабдықтауды алайық. Жалпы тұтынушылар кВт•сағатына 18,46 теңгеден, кәсіпкерлер – екі есе, кВт•сағатына 40 теңгеден төлейді, ал мемлекеттік органдар, мектептер, балабақшалар, ауруханалар және басқа да мемлекеттік ұйымдар үшін жарық үшін – кВт•сағатына 90,63 теңгеден, бес есе қымбат төлейді. Тұтынушылардың әртүрлі топтары үшін ауыз су тарифтері арасындағы алшақтық та айтарлықтай. Қарағандылықтар 1 текше метр су үшін 135,21 теңгеден, бизнес – 770 теңгеден, яғни 5,5 есе көп төлейді. Ал бюджеттік ұйымдарда су тарифі-1 081,4 теңге, яғни сегіз есе жоғары.

Айта кету керек, Қарағанды облысы ең қымбат ауыз суы бар өңірлердің үштігіне кіреді. Бір коммуналды қызметтің әр түрлі тарифі – бұл дифференциация. Бизнес пен мемлекет халыққа қамқорлық көрсетуі керек деп есептеледі. Сондықтан тарифтер арқылы азаматтардың жарық, су және жылыту шығындарын субсидиялайды. Бірақ Қарағанды өңірінің кәсіпкерлері мұны әділетсіздік деп санайды. Олардың пікірінше, сараланған тарифті алып тастау керек. Барлығы бірдей төлеуі керек. Шынында да, дүкенде бір бөлке нан барлығы үшін – зейнеткерлер үшін де, кәсіпкер үшін де, балабақша үшін де 90 теңге тұрады. "Қазақстан" тұтынушылардың құқықтарын қорғау қоғамы төрағасының орынбасары Юрий Меркудинов халықтың тариф үшін өзгелерден аз төлеуі негізді деп есептейді: «Сіздерді, ірі бизнес өкілдерін саусақпен санауға болады. Ал облыста миллионнан астам тұрғын бар. Зауыт пен пәтердің су мен электр энергиясын тұтынуын салыстыруға болмайды. Неге салыстырасыз?! Сіз сараланған тарифті алып тастауды талап етесіз, себебі жеке бизнесіңіз зардап шегеді. Ал халық ше? Тарифтің көтерілуінен зардап шекпей ме???»

Табиғи монополияларды реттеу комитетінің департамент басшысы да үнсіз қалған жоқ. Ол әзірге тұтынушылардың әртүрлі топтары үшін тарифтерді теңестіру міндеті күн тәртібінде жоқ екенін айтты. Қазір екі мақсат маңызды. Олардың бірі – "тарифті инвестицияға айырбастау" бағдарламасы арқылы құбырлар мен жабдықтардың тозуын азайту, екіншісі-инвестициялық бағдарламалар есебінен көрсетілетін қызметті беруші компаниялардың қызметкерлерінің жалақысын көтеру.