Жаңалық - Қазақстан жаңалықтары

новость от 07.12.2020

Қазақстан мен Ресей: Жайық пен Ертіс трансшекаралық өзендерінің экожүйесін сақтау және қалпына келтіру
Мәскеу қаласында ҚР Экология, геология және табиғи ресурстар министрі М.Мырзағалиев Ресей Федерациясының табиғи ресурстар және экология министрі А.Козловпен кездесті.
Ресми кездесуде қабылданған құжаттардың ішінде Жайық трансшекаралық өзені экожүйесін сақтау және қалпына келтіру туралы 2021-2024 жылдарға арналған қазақ-ресей әріптестік бағдарламасы бар.
Соңғы жылдары Жайық өзенінің ағыны төмендеген. Жайықтың тартылуы – екі елдің ортақ экологиялық проблемасы. Бұл жағдай жалпы өзен бассейнінің флорасы мен фаунасының нашарлауына әсерін тигізді. Қабылданған бағдарлама бұл бағытта тиімді нәтижелерге қол жеткізуге, жалпы, Жайық өзені бассейнінің экожүйесін сақтап қалуға септігін тигізеді.
Кездесудегі күн тәртібінің тағы бір маңызды пункты екі елдің Ертіс өзені алабы экожүйесін сақтау мен қалпына келтірудің 2021-2024 жылдарға арналған бағдарламасын қабылдау болды. Бағдарлама актуалды проблемаларды шешу бойынша іс-шаралар кешенін қарастырады. Бағдарлама аясында су өткізу нысандарын реконструкциялау, су нысандарын қалыпқа келтіру, сарапшылардың өзен алабының гидрологиялық және гидрохимиялық жағдайы бойынша бірлескен жұмыс жүргізуі мен еріктілер қозғалысын жандандыру және тағы басқа жобалар жоспарлануда.