Жаңалық - Компания жаңалықтары

новость от 15.12.2020

Депутаттыққа кандидатпен кездесудегі маңызды мәселелер
«Су ресурстары-Маркетинг» ЖШС-і қызметкерлерімен кездесуде «Нұр Отан» партиясынан ҚР Мәжіліс депутаттығына кандидат Берік Оспановқа күрделі, бірақ стратегиялық маңызды сұрақтарға жауап беруге тура келді. Ол белгілі бір уақыт аралығында Оңтүстік Қазақстан облысының атқарушы органдарында жұмыс істеді, сондықтан көптеген мәселелерден хабардар. Бұл жиында не талқыланды?
Алдымен, Берік Оспановтың заң шығарушы органға Шымкенттен сайлауға түсетіндігін айта кетейік. Оның міндеттеріне қаламыздың тұрғындары мен кәсіпкерлерінің мүдделерін қорғау, сондай-ақ шымкенттіктерге өте маңызды мәселелерді шешуге көмектесу кіреді.
Кездесу барысында кандидат өзінің сайлауалды бағдарламасы туралы айтты. Егер сайланатын болса, Берік Оспанов үшінші мегаполис тұрғындарының мүдделерін белсенді түрде ілгерілетуді жоспарлап отыр. Атап айтқанда, халықтың әлеуметтік осал топтарын баспанамен қамтамасыз ету, мектептер мен ауруханалардың құрылысын ілгерілету, қала тұрғындарын сапалы коммуналдық қызметтермен толық қамтамасыз ету. Келесі кезекте сұрақтар қойылды.
«Су ресурстары-Маркетинг» ЖШС-і бас директорының экономика және маркетинг жөніндегі орынбасары Жанатбек Тұрдалиев сумен жабдықтау және су бұру жүйелерін жаңарту мәселесін көтерді. Сонау 2011 жылы үкіметтің қаулысымен бекітілген «Ақ-Бұлақ» мемлекеттік бағдарламасы мен Шымкенттің бас жоспары негізінде «2025 жылға дейін қаланың сумен жабдықтау және су бұру жүйелеріне инвестицияларды негіздеу» құжаты әзірленді. Бұл негіздемелер «Госэкспертиза» РМК филиалының 2015 жылғы бұйрығымен бекітілген. Жыл сайынғы бағаның өсуін ескере отырып, Инвестициялық негіздеме бойынша анықталған жалпы сома 70,2 млрд құрайды. Бұл қаражат «Су ресурстары-Маркетинг» ЖШС-ң балансында тұрған қолданыстағы сумен жабдықтау және су бұру жүйесін қайта жаңартуға және модернизациялауға бөлінген. Қаржыландыру Еуропалық Даму және Қайта құру Банкінің қарыз қаражаты есебінен бюджетті субсидиялау механизмін қолдана отырып жүзеге асырылады деп жоспарланған болатын. Бірақ 2015 жылдан бастап шамамен 16,1 миллиард теңге (22,9%) жұмсалды. 924 шақырымдық жоспармен тек 152 су құбыры мен су желілері тартылды. Мұның басты себебі – инвестициялық бағдарламаларды қаржыландыру көздерін едәуір төмендететін тарифтердің өсуін жасанды шектеу. Сумен жабдықтау және су бұру желілерінің тозу деңгейі жоғары, егер оларды жаңартуға қаражат жұмсалмаса, онда 90-шы жылдарға артқа қарай жылжып кету қаупі бар, деп атап өтті Тұрдалиев мырза. Бұл маңызды мәселе қашан және қалай шешіледі?
Берік Оспанов мұндай мәселелердің шешілуі толығымен қала басшылығына байланысты деп санайды. Оның өзі жаңа елді мекендерді орталық сумен жабдықтау жүйесіне қосу мәселелері қалай қарастырылатынына куә болған, бірақ мұндай кездесулерде қолданыстағы желілердің тозуы туралы мәселе әдетте көтерілмеген. Алайда үміткер егер ол депутат болса, бұл мәселемен міндетті түрде айналысатынына уәде берді.
Жанатбек Тұрдалиев қойған тағы бір сұрақ жалақыға қатысты болды. Кәсіпорында орташа жалақы 114 мың теңгені, ал қаладағы орташа жалақы 164 мың теңгені құрайды. 2013 жылғы 25.04 (№130-ОД) бекітілген Табиғи монополиялар субъектілерінің реттеліп көрсетілетін қызметтеріне (тауарларына, жұмыстарына) тарифтерді (бағаларды, ставкаларды, алымдарды) бекіту кезінде қолданылатын шығындарды қалыптастырудың арнайы тәртібіне сәйкес, аймақтағы орташа айлық жалақы деңгейінде су шаруашылығы қызметкерлеріне орташа айлық жалақы төлеу қарастырылған. Неге үкімет дәрігерлерге, мұғалімдерге және полиция қызметкерлеріне үлкен көңіл бөледі, ал коммуналдық қызметкерлер туралы әңгіме де қозғалмайды? Үміткер сайланған жағдайда бұл мәселені бақылауға аламын деп жауап берді. Кәсіпорын жеке болып табылады, бірақ мемлекет жалақы қорының бір бөлігін субсидиялауы мүмкін.
Салық салу мәселесі өте маңызды, дейді ««Су ресурстары-Маркетинг» ЖШС-і бас директорының орынбасары Лейла Алиева. Бұл салада бюджетке салықтар мен төлемдердің 24 түрі бар – олардың санын азайтуға немесе оларды біріктіруге, осылайша салық салуды жеңілдетуге бола ма?
Ағынды сулар объектілері бойынша мүлік салығының ставкасы 1,5% құрайды, бұл сумен жабдықтау объектілеріне салынатын салықтан 15 есе жоғары. Кәріз нысандары үшін салық мөлшерлемесін 0,1% дейін төмендетуге бола ма? Босатылған қаражат Шымкенттегі сумен жабдықтау және су бұру желілерін жаңартуға және қайта құруға жұмсалар еді.
Берік Оспанов бұл қаражатты желілерді жаңартуға қайта салу тиімді болады деп келісті. Салықтарға келетін болсақ, депутаттыққа кандидат бұл мәселені жақын арада шешуге әрекет ету үшін құжаттар мен деректерді беруді өтінді.
Санитарлық қорғау аймағына қатысты мәселе де шет қалған жоқ. Уәкілетті мемлекеттік органдар Кәсіпкерлік кодекске сілтеме жасай отырып, «Су ресурстары-Маркетинг» ЖШС-і өкілдерінің өтініші бойынша тексерулер жүргізуден бас тартады. «Бұл мәселе заңнамалық деңгейде шешілуі керек, әйтпесе санитарлық-қорғау аймағының нормаларын сақтамау ауыр қайғылы жағдайларға әкелуі мүмкін. Қазіргі уақытта «Су ресурстары-Маркетинг» ЖШС-ң өкілдері 2500-ге жуық заң бұзушылықты анықтады. Біз бұл мәселені жеке шешуге үлгере алмай жатырмыз. Мұнда мемлекет тарапынан көмек керек», - дейді кәсіпорынның заң бөлімінің бастығы Кеңес Әлібаев.
Қазақстан Республикасының Әкімшілік құқық бұзушылық туралы кодексінде газ және электр нысандары туралы айтылғанымен, сумен жабдықтау және кәріз құбырлары туралы бір ауыз сөз қозғалмаған. Мысалы, «су құбыры желілеріне заңсыз қосылу» мәселесі №144 баптан алынып тасталды. Бұл мәселені шешу қажет, деді Кеңес Әлібаев.
Кандидат, негізінен, осы саладағы көптеген мәселелер шешілген, алайда мемлекеттік уәкілетті органдардың жүзеге асыруы ақсап жатыр деген пікірін білдірді.
Қазіргі уақытта сумен жабдықтау және су бұру саласы үшін кадрларды даярлау, сондай-ақ цифрландыру мәселесі өте өзекті болып табылады, бірақ, өкінішке орай, бірде-бір ЖОО осы салаға мамандандырылған мамандар даярламайды. Өндіріс пен ғылыми мекемелер арасында байланыс жоқ. «Осы салада бірдеңе жасау жоспарланған ба?» - деп сұрады қоғаммен байланыс жөніндегі менеджер Валентина Куликова.
Берік Оспанов бірнеше мемлекеттік бағдарламалар әзірленгенін, олар бірқатар мәселелерді ішінара шешуі керектігін айтты. Бірақ егер бірнеше оқу орындары осындай мамандарды даярлау үшін мамандандырылған бөлімдер ашса, жақсы болар еді. Ол тағы да бұл мәселені бақылауға алуға уәде берді.
«Су ресурстары-Маркетинг» ЖШС-нің бас директоры Анарбек Орман егер Берік Оспанов сайланса, ол кездесуде көтерілген мәселелерді шешуге көмектеседі деген үмітін білдірді. Ол үміткерге сайлау додасында сәттілік тіледі.