Жаңалық - Аймақ жаңалықтары

Ақмола облысында орналасқан гидротехникалық құрылғылардың алпыстан астамы тозып тұр. Басым көпшілігі кеңес заманында пайдалануға берілген. "Өңірдегі гидротехникалық құрылғылар расында апатты жағдайда, олардың кейбірі жөндеуді, енді бірі – толық жаңғыртуды қажет етеді. Барлығы шамамен 70% - ға тозған, сондықтан су тасқыны бола қалса, бұзылмасына ешкім кепілдік бере алмайды", – деді облыстық ТЖ департаменті төтенше жағдайлардың алдын алу басқармасының бастығы, азаматтық қорғау полковнигі Ерден Берлібеков Өңірлік коммуникациялар қызметінде өткен брифингте.

Өңір аумағында 90 гидротехникалық нысан бір уақтты салынған, оның 17 – сі республикалық меншікте, 66 – сы коммуналдық, жетеуі жекенің еншісінде. Үшеуі – "Иванковская", "Негізгі" және "Веденовская" бөгеттері қатты тозған. Қанағаттанарлықсыз жағдайда 18 нысан бар. Дегенмен, су тасқынының алдын-алу және еріген қар суын тиісті жүйеге бағыттау бойынша жоспарлы жұмыстар жалғасып жатыр. Мамандар осылай сендіреді.