Жаңалық - Аймақ жаңалықтары

 Сала өкілдерінің мәліметінше, өңір басшысы Дархан Сатыбалды жауапты басқарма басшысы мен аудан, қала әкімдеріне осы бағыттағы тірлікті жүйелеп, бірінші кезекте ауыз су мәселесіне қатысты жұмыстарды жеделдетуді тапсырды.

Жол карталары мен жоспарлар тағы да нақтыланып, елді мекендерді 100 пайыз ауыз сумен қамту жұмысын 2025 жылы толық аяқтауымыз керек, – деді Дархан Сатыбалды. Облыстық энергетика және тұрғын үй-коммуналдық шаруашылық басқармасының басшысы Сәкен Далиевтің айтуынша, биыл 1 қаңтардағы жағдай бойынша Түркістан облысындағы 831 елді мекеннің 719-ы (7 қала, 712 ауылдық елді мекен) немесе 86,5%-ы ауыз сумен қамтамасыз етілген.

2023 жылы 57 нысанның құрылыс жұмыстары бюджет есебінен жүргізіледі. Соның ішінде 43 нысанның құрылысы биыл аяқталады. Қалған 14 нысан 2024 жылы тапсырылмақ. Нәтижесінде су құбыры жоқ 17 елді мекен (Бәйдібек – 1, Сарыағаш – 6, Келес – 4, Қазығұрт –1, Ордабасы – 4, Отырар – 1) ауыз сумен қамтамасыз етіледі, 11 елді мекеннің (Бәйдібек – 2, Қазығұрт – 1, Төлеби – 4, Мақтаарал – 1, Ордабасы – 1, Түлкібас – 2) тозығы жеткен су құбырлары қайта жаңартылады. Сонымен қатар, 16 нысанның жобалық-сметалық құжаты әзірленіп, сараптама қорытындысы алынды.