Жаңалық - Компания жаңалықтары

«Су ресурстары – Маркетинг» ЖШС «Буржар» ағынды су жинақтағышында жасыл микробалдыр — хлорелланы қолдануды табысты түрде жалғастырып келеді.

Отандық Chlorella vulgaris SKO A RKM-0870 штаммы Петропавл қаласындағы Су ғылыми-технологиялық орталығында өсіріледі. Бұл штамм Қазақстанның климаттық жағдайына және ағынды сулар құрамындағы ластаушы заттарға толық бейімделген.

Аталған микроорганизм ағынды суларды қосымша тазартуға ықпал етеді, азот пен фосфор қосылыстарын сіңіреді, су қоймасының табиғи өзін-өзі тазарту үдерістерін іске қосады, сондай-ақ көмірқышқыл газын жұтып, суды оттегімен байытады.

Осының нәтижесінде су залалсыздандырылып, кейін оны техникалық дақылдарды суаруға пайдалануға мүмкіндік туады.

Хлорелла жағымсыз иістерді жоюға да көмектесіп, қолайлы экологиялық жағдай қалыптастырады.

Бүгінгі таңда «Буржар» жинақтағышы өз сипаттамалары бойынша табиғи су қоймасына жақындады: онда шаянтәрізділер белсенді дамып жатыр, жіберілген балық та сәтті жерсінді.

Қол жеткізілген нәтижені сақтау үшін «Су ресурстары – Маркетинг» ЖШС Буржар жинақтағышына хлорелланы тұрақты түрде енгізуді жалғастыруда. Бүгін хлорелланың кезекті партиясы — 1700 литр суспензия құйылды.